Ascensión a Peña Mea (I)

Peña Mea ye un macizu que ta a caballo de los conceyos de Llaviana y Aller, y una de les cumales más emblemátiques del conceyu de Llaviana, cuyu espolón pue admirase dende distintos rincones, motivu pol cual foi y ye un de los oxetivos señeros del montañismu asturianu.

La ruta plantegada nun ye como les anteriores rutes de senderismu, nesta ocasión alcontrámonos cola subida a la mítica cumal que preside tou´l valle llavianés. Ye una ascensión montañera que pue resultar pelligrosa si nun s´asciende col cuidáo necesariu.

L´averamientu ye bastante simple, garramos la carretera AS - 252 dende Llaviana fasta´l Llanutabla, en Tolivia. Siguiremos a la izquierda pola carretera fasta Fresneo. Dende equí, pente una pista apta para tou tipu de vehículos, fasta Les Campes (890 m).
Esti paraxe de mullíes praeres tien como fondo la mole de Peña Mea que tamién se-y pue nomar la "Gran Montaña". La capiella qu´ellí s´alcuentra ta baxo advocación de la Visitación de la Virxen a la so prima Santa Isabel y goza de gran devoción; la so fiesta celebrase´l primer domingu de xunetu. Esta capiella foi llevantada nel sieglu XVII, y restaurada en 1.995, tien una sola nave y espadaña que contien tres pequeñes campanes.

La pista pa la mítica cumal parte d´Entelacapilla delantre´l chigre qu´esiste na zona, El Descansu´l Baqueru, fasta´l primer cruce y tiraremos pa la drecha, y seguiremos pola pista dexando a la nuesa izquierda´l murallón de Peña Mea, la pista asciende ente la viesca fasta la Campa Pel.lúno, equí´l camín dixebrase; el que sigue pol frente baxa pal pueblu de Pel.lúno, nosotros garraremos el de la izquierda que nos lleva a una cabana con dos fuentes y dos abrevaeros, dexaremos a la drecha unes finques nomaes El Cerréu, el senderu fáese estrechu y escomienza a subir, alcontrando los primeros "jitos", con un senderu bien marcáu nos topamos na base la Canal de les Cueves, la llegada a la base d´esta canal ye un d´esos momentos clásicos del montañismu en que ún entrugase porque lo fae. La canal ye amplia y herbosa, pero vista dende baxo´l too la subida impón. Equí empecipia´l tramu más costosu de tola ruta, el senderu serpentea too p´arriba y conduciranos fasta´l famosu Güeyu Buey, ampliu ventanón que trespasa´l crestón de la peña, namái sobrepasar la cresta de roca, a la izquierda podremos echái una güeyada a una cueva, nomada polos llugareños la Ilesiona, n´ella puen apreciase los cuatro pilares que la sostienen
Siguimos ascendiendo pol retorcíu senderu, que nos acerca a la cabecera d´una vertical canal tapizada d´árboles que da vista al valle de Tolivia.