Ruta minera o Coto Musel (I)

La ruta que vamos facer, discurre nos sos anicios, a caballu ente los conceyos de Llaviana y Aller, Llaviana y Mieres y Llaviana y Samartín del Rei Aurelio, pa lluéu siguir, íntegramente, por tierres de Llaviana.
L´Altu la Collaona de 850 metros comunica el valle´l Nalón y el valle d´Aller. La subida dende Llaviana ye daqué más suave que dende l´allerana con doce kilómetros de recorríu. Esti discurre por pueblos y llugares que son escenariu de la novela "La Aldea Perdida", una bella obra de Palacio Valdés; asina mesmo puen contemplase impresionantes perspeutives de Peña Mea.

Magar de la escasa altitú d´esti puertu, domina un panorama soberbiu, debío a la proximidá cola Cordillera Cantábrica. Na pequena praera que conforma l´Altu, pué admirase al SurOeste, el cordal de Muries y Santibanes nel primer planu y un pocoñin más pa la izquierda la Sierra Conforcos. Y dende lo qu´antes yera´l chigre, un pocoñin más parriba la carretera, pa la otra vertiente, apaez una bonita vista de la Sierra de Peña Mayor.

Dende la pequena praera onde dexaremos el coche, cruziaremos la carretera, onde comienza una pista al lláu del chigre, con una lixera subida y dando vista, a la nuesa izquierda al nuesu vecín conceyu allerán. Nel trascursu de la nuesa caminata descubrimos otra opción interesante, trascurre por pista, y les vistes son igualmente estraordinaries ya que vamos divisando tolos cordales d´alredior con diferentes perspeutives.
A unos dos kilómetros, y unos 40 minutos de marcha, garraremos un camín a la drecha y empezipiaremos a subir, fasta alcanzar la cumal del cordal de La Sierra Navaliegu, siguiremos cresteando y dando vista a los pueblos de la parroquia de Tolivia, pola nuesa drecha, y a Peña Ubiña, peña Rueda, etc, pola nuesa izquierda. Dexamos la cresta p´aniciar una lixera baxada fasta llegar al Práu Mónica, que dexaremos a la nuesa drecha, y rodearemos pa siguir el camín que nos lleva a una fuente. Fasta esti puntu tarán recorríos 3,5 kilómetros en 1 hora y 20 minutos aprosimadamente.

Dende´l puntu altu empezipiamos a baxar, y a media ladera, siguiremos en direición al Tres Conceyos. Dempués deberemos volver a subir y a crestear nuevamente, según vamos cresteando, vemos por debaxo la pista que va dende la Colladiella a Urbíes y que pué utilizse pa llegar al área recreativa y mirador que ta debaxo del Picu Tres Conceyos.
Situáos na Campa del Tres Conceyos, tomaremos una pista que sal pa la drecha (la de la izquierda va pa la Colladiella). A unos 200 metros alcontraremos una bonita y fresca fuente a la solombra d´un arbolón, onde pué descansase un ratu. Dempués siguiremos pola pista pa la Campa´l Tretu. Descendemos, suavemente, y un pocoñin antes de llegar a una cabana garramos un senderu a la izquierda, que nos llevará a una campera. Equí debemos garrar la loma pola izquierda y continuar un constante zizagueo ente les lomes, la siguiente pola drecha, la siguiente pola izquierda.