La Collaona - Entrialgo (I)

El recorríu discurre nos sos anicios por tierres del vecín conceyu d´Aller dando-y vista a la so capital Cabanaquinta. Esti pequenu puertu que culmina na Collaona foi utilizáu tradicionalmente pa comunicar les dos cuenques mineres del Nalón y del Caudal.
Xuntando´l Altu Nalón col Altu Caudal, La Pola Llaviana con Cabanaquinta y a la inversa. Dende´l Altu la Collaona 850 m, podemos aniciar varies rutes de senderismu. Les vistes son escepcionales dende´l altu, y ya dende el principiu tenemos indicaes toes o casi toles posibilidades de rutes pal senderista.

Ye interesante la ruta que dende equí llévanos a la Campa Pel.lúno, Les Campes, Campa Doñango, bases de Peña Mea, Campa Felguera, La Pumará y Entrialgo, d´unes 7 hores y nun tien dificultá.
Dende´l Altu la Collaona tomamos un camín que sal a la izquierda (subiendo dende Llaviana), y que nos lleva poco a poco y a media loma a una campera. Dende ésta, siguiremos el camín pola drecha y por debaxo d´un crestón fasta llegar a Les Camperes de Vega LLao.
Dende equí siguimos el camín, que pasa xunto a la cabana, que pué servinos como referencia, y por debaxo de los Cuetos de Vega Llao, siguimos fasta la fuente nomada de L´Argamusu, al pocu tiempu d´haber dexao la fuente llegamos a la Campa Palmillín. Dende esta campa pué contemplase una magnífica vista del Picu Torres, La Cabritera, etc. A partir d´esta campera gárrase una pista y al finar ésta, un camín o senda de monte. Esta ye la única zona en tola ruta na que debemos tener cuidáo de nun despistanos.

Siguimos el nuesu camín con cuidáo de nun despistanos, y dempués d´una lixera subida llegamos a una campa, nomada "Canta Foz", dende onde podemos ver a la nuesa izquierda´l Picu Moqueta.
El camín sigue pola izquierda y en lixera subida, tras unos minutos llegamos al Pasu La Moqueta, únicu prauticable y ensin dificultá pa los grupos de montaña.
Dende lo alto´l Pasu divisamos Peña Mea y a la so falda La Campa Pel.lúno onde nos dirixiremos. Baxamos lentamente, ya en la Campa Pel.lúno, los más valientes podrán optar por subir a Peña Mea, (2 hores 30 minutos aprosimadamente), garramos una pista a la izquierda que nos baxa en direición a Les Campes, onde hai una Ermita mui venerada y onde se cellebra una fiesta´l primer domingu de xunetu.