Fuerte, noble, sabrosa: así ye definía polos espertos la cocina de Llaviana. Si bien munchos de los sos platos son tamién propios d´otros llugares d´Asturies, dos d´ellos en particular puen considerase típicos y específicos del Conceyu.

Quiciabes el más famosu (fasta´l puntu de cellebrase unes Xornaes Gastronómiques) ye´l cabritu con patatos o cabritu con patatinos, que de les dos menes se-y noma. Vien dau´l prestixu pola calidá de la materia prima y la conocencia na so fechura.

Les xornaes, que tienen llugar nel mes de Marzu, puen ser la disculpa perfeuta pa conocer les escelencies d´esti Conceyu, y disfrutar a la vegada d´un escelente menú ufiertáu por tolos restaurantes.

Nun son les citaes les úniques xornaes gastronómiques que se cellebren nel Conceyu, ya que na seronda cellebrase la fiesta gastronómica de "La Aldea Perdida".

Tien merecíu prestixu la pastelería de la Villa: bartolos (un postre típicu de Llaviana), casadielles, tartes, pasteles y roscones de Pascua trascienden el propiu ámbitu llocal, siendo solicitaos dende distintos llugares d´Asturies y España.

Amás del cabritu y los bartolos, hai que destacar na gastronomía llavianesa, ente otros, el pote asturianu, la fabada, la menestra, les carnes y embutíos, asina como la miel de les zones altes.

Mui tradicionales son en Llaviana les espiches, que na zona tienen su orixe n´una costume mui arraigada; que consistía na venta la sidra de les coseches particulares sobrante del añu anterior. Güei, regulaes por Ordenanza´l conceyu, acompañase n´elles la sidra con tacos o pinchos de chorizu, tortiella, güevos duros, llacon y los populares conceyales, nome que refiérse de móu curiosu a trozos de bacalao rebozáu y fritu.