Na plaza Armando Palacio Valdés alcuentrase la Casa Conceyu, edificiu d´estilu Modernista llevantáu a finales del sieglu XIX, inauguráu a principios del sieglu XX, concretamente en 1905. El so conxuntu tien una gran simetría, lo que-y da un elegante aspéutu. Ta formada d´una planta con pórticu de 5 arcos de mediu puntu sobre sillares.
Asitiada´n plenu coral de La Pola Llaviana. D´estilu neogóticu hai que destacar n´ella la torre-campanariu. L´interior con nave central y dos laterales sobre arcos oxivales, tien una decoración mui austera resaltando les policromaes vidrieres y cuadros qu´arrodien la talla de la Asunción de la Virxen.
Dende la plaza La Pontona, un kilómetru aprosimáu separanos del cementeriu, llugar nel que alcuentrase´l Santuariu de la Virxen del Oteru; a él dirixiremonos subiendo pola empinada cai cuyu nome alude la nomada virxen.El Santuariu, pué atribuise a fecha posterior al sieglu XV. Nel interior, al que s´accede pola puerta esterior al cementeriu, ye notable´l so perguapu retablu barrocu, del sieglu XVII.
Nel prósimu pueblu d´Entrialgo, alcuéntrase la casa natal del conocíu escritor llavianés Armando Palacio Valdés. Tien un cartelu cola fecha nacimientu del escritor. Esta casa pué visitase.